ВМРО ДПМНЕ и СДСМ ќе ги кршат копјата за претседател на Комисијата за избори и именување

Добивај вести на Viber

Нова средба на партиите денеска по повод координациите во Собрание.

Парламентарните партии го решија прашањето со членовите на Комисијата за избори и именување, но сега ќе се кршат копјата за претседателот на ова собраниско тело.

Од владеачката ВМРО ДПМНЕ и покрај тоа што добија најмногу, или шест члена во комисијата, сега бараат и нивен пратеник да застане на претседателската функција .

СДСМ има 5, а ДУИ и БЕСА останаа со по еден член во Комисијата за избори и именување.

Од партијата на Никола Груевски велат дека досега немало ситуација во која претседател на ова собраниско тело бил некој од втората, третата или четвртата партија.

Илија Димовски вели дека тоа била најважната комисија за работата на Собранието.

Според СДСМ пак овој став на владеачката партија е показател дека ВМРО ДПМНЕ не се откажува од узурпација на  институциите на системот и сакаат да ја опструираат работата на Собранието.

„ВМРО-ДПМНЕ треба да се вразуми и да сфати дека претседател на Комисијата не може да биде пратеник од партија која го нема мнозинството во Собранието“, тврдат пак од партијата на Заев.

Првиот човек на Комсијата ќе треба да предложи претседател на новото Собрание, а екс спикерот Трајко Вељаноски ќе има задача да закаже продолжување на конститутивната седница.