ВМРО-ДПМНЕ и СДСМ се обвинуваат за тоа кој оставил инфраструктурен пустош
Објавено во: Македонија 29 Март, 2018
Владо Мисајловски, потпретседател на ВМРО-ДПМНЕ вели дека добро е што Владата на СДСМ ќе продолжи со изградбата на проектите од ВМРO-ДПМНЕ, но лошо е што оваа според него неспособна Влада скоро една година нема започнато ниту еден капитален проект, а градежништвото е во пад од околу 20 проценти.
„Скоро една година ги манипулира граѓаните дека ќе почнат нови 600 километри автопати, а во реалноста не можат ни да го пуштат во употреба завршениот автопат Демир Капија – Смоквица. Ако за една година не можат да пуштат завршен автопат можеме сите да замислиме што се случува со сите останати проекти во инфраструктурата“ – рече тој.
Со 11-годишното криминално владеење ВМРО-ДПМНЕ остави пустош во инфраструктурата, а секој нивен таканаречен инфраструктурен проект беше симбол на криминал, неспособност и корупција, обвинија денеска од СДСМ.
Според партијата, поради неспособноста и криминалните интереси на ВМРО-ДПМНЕ и пропустите на автопатиштата, државниот буџет беше оштетен за стотина милиони евра, пари на граѓаните.
Велат започна сериозен инвестициски циклус за подобрување на целокупната патна инфраструктура. За таа цел се обезбедени 270 милиони евра за изградба и реконструкција на 60 патни правци со вкупна должина од околу 800 километри, додаваат од СДСМ.