ВМРО-ДПМНЕ: СДСМ, Заев и Димитров ја однесоа државата во ќорсокак

Добивај вести на Viber

Oд ВМРО-ДПМНЕ реагираа на изјавите на екс министерот за надворешни работи и вицепремиер за европски прашања во оставка, Никола Димитров, кој кажа дека нема целосна доверба во актуелниот шеф на дипломатијата, Бујар Османи. 

Од партијата порачаа да не глуми генерал после војна и дека наводно бил жртва на злобната Бугарија, туку како што велат тој е жртва на својата неспособност и распродавањето и поигрувањето со државните интереси. 

„Наместо Европа на Македонија, СДСМ, Заев и Димитров ја однесоа државата во ќорсокак во однос на европските интеграции. Димитров е кариерист кој ги заплетка и комплицираше односите со сите наши соседи и го поларизираше општеството. Задоцнета е грижата на кариеристот Димитров за националните и државни интереси, бидејќи беше првиот кој ги продаваше кога СДСМ беше во налет и цврста власт, и целосно ги игнорираше предупредувањата на ВМРО-ДПМНЕ. Сега неговата грижа освен што е лажна и лично мотивирана таа е и задоцнета“, велат од ВМРО-ДПМНЕ.

Димитров отворено изјави дека нема целосна доверба во министерот за надворешни работи Бујар Османи, подвлекувајќи дека неговите напори да успее во преговарачкиот процес не само што се погрешни, туку и опасни.

Поранешниот министер за надворешни работи вели дека не се повлекол сам од функцијата и оти тоа што нема да биде дел од новата влада е резултат на неговите позиции во однос на прашањето со Бугарија. Нагласува дека нечиј интерес и во земјата и надвор од неа е тој да не биде дел од владата, но и да не биде дома, поради што, како што истакна, добил понуда за амбасадорско место што го одбил.