Внимавајте, ако при земјотресите ви напукнал оџакот, може да дојде до пожар

Добивај вести на Viber

Доколку во серијата земјотреси кои ја зафатија Македонија ви напукнал оџакот, тоа може да предизвика пожар.

За таа цел, оџачарите советуваат или сами да проверите дали има пукнатини, или да повикате стручно лице. Оџачарот Гоце Скепароски објаснува дека ако не веднаш, последиците од напукнувањата на оџакот може да направат проблем дури идната грејна сезона. Оџаците обично при земјотрес пукаат хоризонтално, а со формирање на саѓе внатре, лесно може да дојде до запалување.

„Во земјотресите кои се случија, буквално се тресеше цела куќа, така што постои ризик да дошло до пукање на оџаците и тоа во иднина да предизвика запалување. Има голема опасност и затоа луѓето треба да си направат проверка. Дали ќе дојде до пожар, зависи од тоа дали е чистен оџакот, колку често се чисти, и штетни последици од напукнувањето може да има идната грејна сезона, или по 2-3 години. Кај нас многу домаќинства се греат на дрва, затоа што тоа за нив е поевтино, и при тоа има една група луѓе која редовно чисти оџаци, но има и такви кои 14 -15 години не ги исчистиле оџаците на домовите. Барем еднаш годишно треба да се чисти оџакот. Имало и случаи кога дошло до пукање на оџакот и запалување, е сега дали е од земјотрес или некоја друга појава, не знаеме. Ако оџакот е полн со саѓе, една искра е доволна за се запали“, вели Скепароски.

Недела дена земјава ја тресат земјотреси. Тие беа со епицентар на македонско – грчката граница, односно во околината на Лерин или близу Битола. Во неколку наврати се тресеше и Скопје. Еден од земјотресите беше со јачина од над 5 степени, при што се урнаа оџаци, балкони, ѕидови од стари куќи. Него го почувстуваа жителите  на повеќе македонски градови. Во меѓувреме, граѓаните на Битола и Ресен пријавуваат материјални штети во општините. Синоќа слаб земјотрес имаше близу Битола. 

Сања Атанасовска

foto unsplash.com