Внимавајте, со празничната гозба не му предизвикувајте шок на организмот

Добивај вести на Viber

За време на празниците, кога имаме полни трпези со секакви јадења, граѓаните често знаат да претераат со храна и алкохол.

Но, она на што треба да внимаваме е да не му предизвикаме шок на организмот, поради што подоцна ќе почувствуваме подуеност и тегоби. Нутриционистот Фани Гулевска вели дека треба да имаме избалансирана исхрана и да бидеме умерени. Објаснува дека доколку сме претерале за време на празниците со масна храна, во следните денови треба да конзумираме полесна храна.

„Знаеме дека за Нова година на трпезите има месо, печења, скара, руска салата, кифлички, и ако тој ден сме внесувале тешка храна, идните денови треба да внесуваме повеќе салати, цедени сокови,  лимон, вода. Едноставно да си го почистиме организмот. Многу е важно да бидеме умерени, затоа што ако внесеме и голема количина на овошје, можеме да си направиме контра ефект по здравјето, во однос на нивото на шеќер. Обично околу празниците слушаме муабети од типот „се здебелив неколку килограми“, но промените не се невозможни и ние треба да ги направиме“, вели Гулевска.

Таа додава дека освен што е важна количината на храната, важно е и какви комбинации од намирници внесуваме во организмот. Постојат комбинации кои не се идеално решение од аспект на нутриционистите.

„Месото треба да избегнуваме да го комбинираме со компир или со ориз, и истото треба да го јадеме со некоја салата. И рибата подобро е да ја конзумираме со некој гарнир“, додава Гулевска.

Нутриционистот објаснува дека и со посната храна не треба да се претерува, и да дојде до прејадување. Вообичаено секоја година, на 1 јануари од болниците соопштуваат колку граѓани се пејале и препиле за време на најлудата ноќ и побарале лекарска помош. Оваа година меѓу оние кои претерале со алкохолот, имаше млади,  но и повозрасни лица.

foto freepik.com