Во четврток пресуда за киднапирањето на Самоил, внукот на Љубе Бошковски

Добивај вести на Viber

Во четврток ќе биде објавена пресудата за киднапирањето на Самоил Костадиновски,познат уште и како внук од сестра на политичарот Љубе Бошковски, откако денеска во Основниот кривичен суд Скопје се одржаа завршни зборови.

Обвинителот Дарко Петревски денеска од судот побара обвинетите Виктор Милановски и Саша Челичиќ да бидат прогласени за виновни. Обвинителството ги товари овие двајца дека го грабнале, односно помогнале да биде грабнат, за да го натераат да плати за дрога од 4 килограми. Самоил по 13 месеци откаско е киднапиран, не е пронајден, а неговите најблиски сметаат дека најверојатно е убиен за да му бидат земени парите.

Ѕвонко Давидовиќ, адвокат на првообвинетиот Виктор Милановски, рече дека немало логика во доказите, а според адвокатот Драган Пешевски, бранител на второобвинетиот Челичиќ, обвинителството не докажало ништо против второобвинетиот и тој побара ослободителна пресуда.

– Самоил беше мој другар и пријател, се дружевме, бев кај него дома, никогаш не би помислил да направам нешто такво, а камо ли на некој што ми бил другар, пријател, како брат, рече обвинетиот Милановски

Челичиќ посочи дека е нездраворазумски да се помисли дека помогнал во киднапирањето.

– Нема да дозволам некој да ме обвинува мене за туѓите зделки. Јас имам 31 година и се стремам да создадам семејство, рече тој. 

За истиот настан, постапката против уште едно лице е привремено прекината до негово пронаоѓање и лишување од слобода.

Со цел да се прикријат трагите, возилото со кое е извршено кривичното дело и во кое последен пат бил виден оштетениот, било опожарено во Драчево.

Јавниот обвинител, со поднесување на обвинението, предложи да биде продолжена мерката притвор за првообвинетиот, додека за помагачот претходно определените мерки на претпазливост да се заменат со мерка куќен притвор.

Процесот го води судијката Славица Наумова Јосифовска, пресудата е закажана  на 4 април во 12 часот.