Во Грција задоволни од тоа што нивните авиони ќе го чуваат македонскиот воздушен простор
Објавено во: Македонија 03 Април, 2019
Алтернативниот министер за одбрана на Грција, Панос Ригас, по постигнатиот договор грчките воени авиони да го чуваат македонскиот воздушен простор кога земјата ќе стане 30-та членка на НАТО, денеска рече дека „соседите им веруваат на грчките воени сили“.
Според Ригас, се испишува нова историја со вчерашните договори што беа потпишани во Скопје во делот на одбраната, а освен спогодбата за прелети со грчки борбени воздухоплови, ќе се соработува и во обуката и пренесување на знаењето кај македонската армија и воените училишта.
"Ние веќе сме одговорни за воздушниот простор на другите земји преку постојните процедури и тоа затоа што конкретните земји не можат сами да го сторат тоа, што значи дека тие ни веруваат и веруваат во нашиот постојан став да придонесеме за мир во регионот. Со овој договор, Грција ја презема одговорноста и за воздушниот простор на Северна Македонија ", истакна Ригас.
Министерот за надворешни работи, Јоргос Катругалос, во вторникот откако се состана со Метју Нимиц, поранешен специјален претставник на Обединетите нации за решавање на спорот за името помеѓу Грција и Македонија, рече дека особено добар бил постигнатиот договор во делот на одбраната.
"Оваа посета беше правилно наречена историска. Не само што се потпишани договори, од кои некои се навистина важни, како што се оние за воена соработка. Грција ќе биде одговорна за покривање на воениот воздушен простор на соседната земја со сопствени ресурси", потенцираше Катругалос.