Добивај вести на Viber
Во македонската Влада немаат коментар за апсењето на индискиот бизнисмен Субрата Рој, кој најавуваше инвестиции и во земјава. На новинарско прашање, како ја коментира последната информација дека Рој им се предал на индиските власти и се очекува да биде задржан во притвор до продолжувањето на судскиот процес против него, владиниот портпарол Александар Ѓорѓиев рече дека нема коментар и ги упати новинарите одговори да бараат во претставнишвото на фирмата на Субрата Рој во Индија.
Коментар нема ниту министерот за економија Ваљон Сарачини, кој вели дека со Субрата „се сретнал само еднаш“.
Рој во Македонија најави инвестиции вредни три милијарди евра во аграрниот сектор и во туризмот. Тој неколкупати доаѓаше во земјава за да ги потврди инвестициските планови. Од неговото претставништво во Скопје вчера изјавија дека и покрај налогот за апсење на индискиот бизнисмен, неговите планови за инвестирање во Македонија остануваат.