Врвот со делта сојот ќе го достигнеме на средината на септември, вели Кунгуловски

Добивај вести на Viber

Делта сојот е позаразен, a врвот ќе го достигнеме на средината на септември, изјави  д-р Горан Кунгуловски.

Вели дека потребно е пократко време од контакт до PCR позитивен резултат при инфекција со делта сојот. 

„Ако со изворниот сој просекот бил 5.7 денови, со делта сојот е 3.7 денови. И тоа со делта, околу 12.5 отсто стануваат позитивни после 2 дена, 27 отсто после 3 дена, 20 отсто после 4 дена, 24 отсто после 5 дена и останатите после 6 или 7 денови. Кај заразени со делта сој се детектира просечно околу 1.000 пати повисока концентрација на вирус отколку со изворниот сој“, вели тој. 

Додава дека ќе треба многу прецизно да се следат контактите на заразените. 

„Вакцините се уште си ја вршат својата работа. Во зависност од вакцината, ризикот за зараза е 10-20 пати намален во споредба со невакциниран (непрележан). Значи луѓето се уште може да се заразат, посебно тие што се во постојан контакт со заразен, ама веројатноста е драматично намалена. Вакцинираните покрај тоа што имаат помала веројатност да се заразат, доколку се заразат имаат помала шанса да заразат некој друг.

Вакцините сеуште си ја вршат својата работа. Во зависност од вакцината, ризикот за сериозни симптоми и смртен исход е десетици можеби и стотици пати намален во споредба со невакциниран (непрележан). Пример ако кај невакцинирано население би имало 20 смртни исходи, кај вакцинирано би имало 1. Неопходно е приоритетно вакцинирање на постарото население и населението со коморбидитите. Така ќе се намали бројката на сериозно болни и бројката на смртни исходи. Со понатамошна вакцинација и евентуално трета доза, ќе може да се намали и ланецот на трансмисија. Така ќе се сузбие пандемијата“, вели докторот. 

Објаснува дека нема друг начин туку само вакцини, редовно тестирање и одговорност.

Во последните 24 часа се направени 4.713 тестирања, а регистрирани се 219 нови случаи на КОВИД-19.