За бугарски пасош се плаќало и во биткоини?
Објавено во: Македонија, Балкан 01 Ноември, 2018
За добивање на бугарски пасоши поткуп се плаќал и во биткоини.
Обвинителството во Бугарија информираше дека при претресите, покрај пронајдените пари имало и биткоини.
Во притвор остануваат тројца од четворицата обвинети. Директорот на Државната агенција за Бугарите во странство Петар Харалампиев, генералниот секретар Красимир Томов и Марко Стојов. Четвртата обвинета, поради влошената здравствена состојба, е пуштена да се брани од слобода со парична гаранција.
Истрагата е започната во јули лани, откако Харалампиев стапил на функцијата. Обвинителството ги сомничи Харалампиев и секретарот Томов дека ја организирале групата за да издава неосновани потврди за бугарско потекло на странци, за добивање бугарски пасош. За таа услуга наплаќале од 5.000 до 8.000 евра.
Оваа афера е откриена пред четири дена. За една година 10.000 Македонци барале бугарски државјанства и тие се најбројни заедно со Украинците и Молдавците.
„Главен извор на финансии за ВМРО била услугата од продажба на бугарско државјанство на Македонците преку две фирми, едната за превод, а другата е адвокатска фирма. ВМРО носи политичка одговорност, а Каракачанов лична и политичка одговорност“, вели независниот пратеник во бугарскиот парламент, Велизар Енчев, по апсењата во Државната агенција за Бугарите во странство.
Енчев бара бугарскиот министер за одбрана и лидер на ВМРО да си поднесе оставка.