За една година уништени над 10 тони небезбедна храна!

Добивај вести на Viber

Вкупно 10.483 килограми небезбедна храна биле уништени лани, по пријава од купувачи, информираа во Стопанската комора на Македонија на состанокот организиран по повод 15 март - Светскиот ден на потрошувачите. Овој ден годинава се одбележува под мотото „Остварени резултати во заштита на правата на потрошувачите - кодекси надобра пракса“. Најголем дел од македонските граѓани се жалеле на поминат рок на употреба, непочитување на хигиенските и производните стандарди на прехранбените производи, но поплаки се доставуваат и за несоодветно истакната цена, немање декларација или гаранција, незидавање фискални сметки, условување со еден производ да се купи и друг, измами со наводни сезонски намалувања, купени производи со лош квалитет или скриен недостаток. „Сите поплаки се оправдани, оти граѓаните веќе знаат на што треба да реагираат и чувствуваат кога нивните права се прекршени. Затоа се обраќаат до невладиниот сектор и, сè повеќе, до институциите за да ги остварат правата“, вели претседателката на Организацијата на потрошувачите, Маријана Лончар - Велкова. Сепак, најмногу поплаки за заштита на потрошувачките права има за услугите на телекомуникациските оператори, дури повеќе и од оние за безбедноста на храната или квалитетот на облеката. Граѓаните се жалат на лош сигнал, нестабилност на мрежата, продолжување на договори без претходно консултирање со корисникот, неразбирливи наградни игри, плаќања за услуги кои не ги побарале. „Лани на бесплатниот телефон на телекомуникацискиот регулатор се јавиле 14.115 граѓани за да се информираат како да го остварат правото на приговор. До Агенцијата за електронски комуникации се поднесени 2.032 приговори, што е двојно повеќе од предходната година“, вели Влатко Спирковски од АЕК. Иако најголемиот дел од поплаките биле оправдани, само 13 отсто од нив се прифатени од операторите, а дури 64 отсто се отфрлени. Од Министерството за економија за идната година најавуваат донесување на нов закон за потрошувачи кој ќе биде целосно усогласен со европските барања.