За Мицкоски е неприфатливо Јанева и нејзините роднини вработени во СЈО да бидат префрлени во државното обвинителство
Објавено во: Македонија 06 Август, 2019
Лидерот на ВМРО-ДПМНЕ Христијан Мицкоски на Фејсбук му одговори на премиерот Зоран Заев кој рече дека е време за конечен пораз на „заробената држава“ и наведува дека по три години власт не докажале дека е заробена држава, но затоа Македонија денес според него е изгубена држава.
Мицкоски причината за тоа дека Македонија е изгубена држава ја лоцира во начинот на кој владее Заев.
За Мицкоски е неприфатливо е сегашната специјална обвинителка Катица Јанева и нејзините роднини и пријатели вработени во СЈО по сила на закон да биде префрлена во државното обвинителство. Наместо тоа, лидерот на ВМРО-ДПМНЕ бара расчистување на случајот „Рекет“.
Тој вели дека ВМРО-ДПМНЕ не може да поддржи закон чија единствена цел е амнестија на криминалот на Заеви и пресметка со политичките противници од опозицијата, но и дека имплементацијата на правдата зависи токму од неговата партија.
Од СДСМ коментираат дека ВМРО-ДПМНЕ има шанса да покаже дека е на страната на правдата со прифаќање на законот за обвинителство.
Законот за јавно обвинителство е на дневен ред на седницата на 27 август.