За плановите на Субрата Рој кај Љубаниште никој не ја информирал Албанија

Добивај вести на Viber

Се подготвува редовна седница на билатералниот секретаријат, на чиј дневен ред ќе биде и прашањето со изградбата на луксузниот хотелски комплекс веднаш до границата со Албанија - вели Аријан Мероли, прв човек на билатералниот секретаријат за управување со Охридско Езеро.

Договорот за заштита на Охридско Езеро и неговиот слив од 2004 година е потпишан и од владите на Македонија и на Албанија и ратификуван во двата парламенти. Овој договор беше изготвен и потпишан во соработка со УНЕСКО.

Членот на билатералниот комитет од албанска страна, Аријан Мероли, во изјавата за Утрински весник вели дека за идејата на индискиот бизнисмен досега никој не ја контактирал албанската страна, на ниедно ниво, ниту официјално, ниту лично него.

„За жал, нема ниту една конкретна информација од македонска страна. Знам онолку колку што самиот сум се информирал во вашето Министерство за заштита на животната средина, Националниот парк ’Галичица‘, Хидро-биолошкиот институт и од македонските медиуми. Имаме потпишано и ратификувано билатерални договори и меѓународни конвенции да се информираме меѓу себе за сите активности кои имаат влијание на квалитетот на водата, флората и фауната во литералната зона на езерото. Само меѓудржавниот договор бара почитување на осум меѓународни конвенции. Примена на сите стандарди и норми во ЕУ и нов статус на езерото“, вели Мероли првиот човек на билатералниот комитет за управување со Охридско Езеро и најавува дека веќе се подготвува редовна седница на чиј дневен ред ќе биде и прашањето со изградбата на луксузниот хотелски комплекс веднаш до границата со Албанија.