За предностите и недостатоците од Болоњскиот систем на студирање

Добивај вести на Viber

Болоњскиот систем на студирање, предностите и недостатоците од него беа главна тема на денешниот Отворен ден на високото образование, во организација на Ректоратот на  Универзитетот „Св.Кирил и Методиј“ од Скопје. „Позитивна работа на Болоња која е препознатлив знак на самиот систем е проодноста или мобилноста што тој ја нуди, односно можноста за студирање на еден универзитет и префрлање на друг, препознавање на студските програми и предметите. Многу е важно да биде зачувана таа проодност, со цел студентите да ги користат бенефитите во иднина.Треба да се задржат предностите на Болоња, а фокусот да биде на слабостите кои некои европски земји веќе ги идентификуваа и преземаат чекори за нивно надминување“, посочи министерот за образование Панче Кралев. Според Ректорот на УКИМ, Велимир Стојковски, треба да се направи ревизија на некои сегменти од Болоњскиот систем, а повеќето професори побарале и враќање на завршниот усен испит за проверка на знаењето на студентите. „Се поставува прашање за одделни сегменти од Болоњската декларација, но не може да се каже дека Болоња е процес што воопшто не функционира. Придобивка на овој систем е токму усогласување на регулираните професии, каде што спаѓаат медицината, стоматологијата, ветерината, градежништвото, на ниво на Европската унија. Со помош на овој систем и со одделени проекти се изготви рамка на квалификации, што значи дека сите студенти кои студираат по Болоњскиот систем, покрај дипломата добиваат и додаток на дипломата со кој ќе бидат препознатливи на пазарот на трудот во Европа“, истакна Ректорот. Последниве години околу 90 отсто од средношколците заминуваат на факултет.Со Болоњскиот сисем на студирање, дополнително расте и бројот на магистри, а вработувањето сеуште останува огромен проблем за сите високообразовани млади луѓе.