За СДСМ протоколот е пораз на Груевизмот, за ВМРО-ДПМНЕ завршува една неправда

Добивај вести на Viber

Од СДСМ велат дека потпишувањето на Протоколот за пристапување на Македонија во НАТО е најголемиот пораз за осудениот криминалец Никола Груевски, неговите криминални и антидржавни политики и неговиот пион Христијан Мицкоски. 

Велат дека единаесет години Груевски ја држеше Македонија во заложништво, во изолација само со една цел криминално да се богати на сметка на осиромашените граѓани и држава. 

„Денес, кога Македонија седнува на своето столче во најголемиот безбедносен сојуз, криминалецот Груевски од Будимпешта се јави со нови насоки на неговиот пион Христијан Мицкоски. Залудно Груевски се обидува да му дава инструкции на Хидро Мицкоски, нема да успеат, граѓаните ги поразија, нема да ја вратат Македонија во темното минато на криминал, неизвесност и изолација“, се вели во партиското соопштение. Од партијата додаваат дека „иднината на Македонија е во ЕУ и НАТО, а иднината на криминалецот Груевски е во затвор, на издржување на казната што судот му ја одреди“, наведуваат во соопштението. 

„Ова е важен ден за Република Македонија и денес се завршува една неправда нанесена на државата од пред повеќе од 10 години. Влезот на Република Македонија во НАТО е долго очекуван и заслужен уште од 2008-тата година. Република Македонија уште на самитот во Букурешт ги имаше исполнето сите реформи и услови за полноправно членство, но за жал тогаш беше спречена да стане членка само поради противењето на Република Грција и нејзиниот проблем со нашето уставно име и идентитет, кои сега на штета на граѓаните и државата на непринципиелен начин беа сменети по нивна мера“, додаваат од ВМРО-ДПМНЕ. 

Претходно, екс премиерот Никола Груевски на Фејсбук напиша дека од почетокот до денес, е отворен поборник на членството на Македонија во НАТО и ЕУ.