За седум милиони евра ќе се купуваат биохемиски анализатори за здравството

Добивај вести на Viber

Со јавен повик ќе се купуваат тестови за биохемиски анализатори  вредни околу седум милиони евра. Како што информираа од Министерството за здравство, оној што ќе го добие тендерот за реагенси, ќе треба да обезбеди и 11 автоматски биохемиски анализатори за девет јавни здравствени установи, бесплатен сервис и бесплатна замена на резервни делови. Како што информираше министерот Никола Тодоров, понуда ќе ја добие оној кој ќе настапи со најниски цени. Објасни дека до сега, набавките се вршеле по обратен редослед. Прво некој од добавувачите како донација ги давал анализаторите на јавните здравствени установи, но потоа тие морале да купуваат реагенси од него најчесто по многу повисоки цени. „Со овој тендер, всушност продолжуваме со претходно воспоставениот систем за набавка на биохемиски анализатори. Ова е втора ваква набавка, со претходната која беше пилот проект беа опфатени три здравствени установи, кога беа заштедени средства во висина од околу 40 илјади евра“, истакна Тодоров. Според најавите, новите анализаторите ќе бидат наменети за клиниките за детски болести,  гинекологија, хематологија,  онкологија и радиотерапија, Клиничка биохемија, како и за болницата Свети Наум Охридски и за клиничките болници во Битола, Тетово и Штип.