ЗА ВМРО-ДПМНЕ Е ПРИФАТЛИВО: Дали ќе имаме двојни избори на 8 мај?

Добивај вести на Viber

Двојни избори можно е да се одржат на 8 мај идната година.

Тоа е можниот датум за одржување на втор круг од претседателските избори заедно со парламентарните. Премиерот Димитар Ковачевски денеска изјави дека постои доволно простор во мај да се организираат изборите во нивниот редовен термин, но дека конечниот договор меѓу партиите ќе се соопшти деновиве.

Во согласност со уставните рокови, 8 мај е последен термин во кој може да се одржи втор круг од претседателските избори и прв термин за одржување на парламентарните избори. Спикерот Талат Џафери неодамна објасни дека единствен термин за да се одржат заедно претседателските и парламентарните избори во редовен термин е 5 мај, но затоа што на тој датум се паѓа Велигден, споени избори може да има на 8 мај во среда. Со реакција се јавија од ВМРО-ДПМНЕ.

„Ова е чекорот што го баравме и го очекувавме со оглед на тоа што споени избори се единствен логичен расплет на настаните со тоа што ќе се одбегне грч на стопанството и потребата финансиски да се оптоварат граѓаните преку зголемени трошоци за евентуални разделени избори“, изјави Наум Стоилковски, портпарол на ВМРО-ДПМНЕ.

Ако изборите се закажат на 8 мај, тогаш Собранието до 29 јануари треба да ја избере техничката влада, чиј мандат е 100 дена пред парламентарните избори. Oпозицијата извесно време бара избори. Тие се против уставните измени.