„За заедничка Македонија“ и вчера протестираше против албанската платформа

Добивај вести на Viber

Поддржувачите на граѓанската иницијатива „За заедничка Македонија“ продолжија и синоќа со протести во Скопје и во уште 30 градови против платформата на албанските партии, која како сметаат го загрозува унитарниот карактер на државата.

Еден од организаторите Богдан Илиевски рече дека вечерва ширум Македонија на протести се собрале повеќе од 150 илјади граѓани. На демонстрантите во Скопје им се придружија и камионџии и сите заедно изразиле подготвеност да истраат во напорите за зачувување на унитарноста на државата и одбрана на Уставот на Македонија.

На неколку локации во Скопје беа излепени плакати со фотографиите на пратениците од СДСМ Стево Пнедаровски, Павле Богоевски и Ивана Туфегиќ, кои симболизираат потерници.

На плакатите се наведува дека пратениците од СДСМ се предавници, бидејќи „прифатиле официјализирање на албанскиот јазик како втор официјален, двојазични банкноти и редефинирање на државата“.

Протестите во Скопје почнаа откако лидерот на ВМРО ДПМНЕ ја обвини СДСМ и Заев дека заедно со албанските политички партии подготвуваат редефинирање на Македонија и ги повика граѓаните да се вклучат во одбрана на државата.

Македонија се наоѓа во длабока политичка криза уште по предвремените парламентарни избори одржани во средината на 2014 година.