„За заедничка Македонија“ инсистираат Хан да ги слушне, велат не смее да се игнорира народот

Добивај вести на Viber

Од граѓанската иницијатива „За заедничка Македонија“ денеска на прес-конференција која ја одржаа пред делегацијата на Европската унија во Скопје, повторно побара средба со еврокомесарот за проширување, Јоханес Хан кој утре ќе ја посети Македонија. 

Велат дека никој не смее да го игнорира народот во Македонија. Објаснуваат дека тие се претставници на иницијативата која секојдневно ја поддржуваат до 200.000 граѓани во цела Македонија.

„Бараме од комесарот Хан да знае дека не може да се прави есап за народот во Македонија без народот во Македонија и бараме да се сретне со нас за да ги реафирмираме нашите барања кои што се ултимативни и непроменливи“- вели Богдан Илиевски од иницијативата „За заедничка Македонија“.

Илиевски  очекува најголема масовност утре и ги повика сите граѓани на денот на посетата на Хан да излезат на улиците и уште еднаш, да му повторат и покажат и нему и на домашните политички чинители дека никој не смее да ги игнорира.

Портпаролката на Европската комисија, Маја Коцијанчич, кажа дека Хан, утре нема да се сретне со претставниците на иницијативата „За заедничка Македонија“ затоа што овојпат комесарот ќе разговара само со политичките претставници и неговата агенда не дозволувала повеќе.