Заев: Пред последниот чекор сме во ослободувањето на судството од режимот
Објавено во: Македонија 05 Август, 2019
Премиерот Зоран Заев се обрати преку видео-порака по повод последните случувања поврзани со Предлог-законот за јавното обвинителство и порача дека никој нема да биде привилегиран и амнестиран.
„Огромна е одговорноста на политичките субјекти во борбата за правна држава. Но најголема одговорност има партијата што и донесе неправда на земјата и Мицкоски како прв човек на таа партија. Знам дека вие граѓаните сте изморени од политички бојкотирања и одлагања и дека барате одлучни чекори. Затоа јас ќе продолжам уште порешително да ја повикувам и убедувам опозицијата да ги продолжи реформите. Ова е време во кое правдата стапува на сцена, Време во кое не смее да има штедење во борбата против криминалот и корупцијата. Никој не е привилигиран и никој нема да биде амнестиран“, порачува тој.
Претседателот на Владата го охрабрува обвинителството да ја прошири истрагата во случајот „Рекет“.
„Го охрабруваме Јавното обвинителство до последно да ја продолжи истрагата, без разлика до кого ќе стигне истата. Ова е време на конечен пораз на заробената држава. Ве повикувам сите да ги поддржите решенијата за реформи во овој наш заеднички убав мозаик, во ова наше заедничко општество“, наведе Заев.