Заев: Со Бугарија можам да помогнам деловно, против референдумот ќе бидат 75 отсто граѓани

Добивај вести на Viber

Поранешниот премиер Зоран Заев денеска, претежно за бугарските медиуми, изјави дека Македонија и Бугарија повторно се враќаат на „патот на пријателството и добрососедството“

Заев присуствуваше на настан во Американскиот универзитет на Европа – ФОН на доделувањето титула почесен доктор на Илхан Ќучук, европратеник и известувач на Европскиот парламент за Република Северна Македонија.

- Неодамна имаше средба на премиерот Ковачевски со претседателот Румен Радев и со вашиот технички премиер, веќе работиме на економски проекти и на енергетската криза, како и на многу други активности. Јас верувам дека се враќаме на патиштата на пријателството, соработката и добрососедството. Јас многу пати сум кажал - ние сме блиски народи, ние сме со иста заедничка перспектива и ние треба да обезбедиме нашите деца да може да соработуваат. Стојам секогаш на располагање на помош на добрите односи како поранешен премиер. Го сакам бугарскиот народ, како што си го сакам македонскиот, а можам да бидам од помош во деловната соработка, поради тоа што веќе се вратив во бизнисот и работам економија, порача тој.

Поранешниот премиер како одговор на новинарско прашање рече дека 75 отсто од граѓаните се против иницијативата на ВМРО-ДПМНЕ за референдум за укинување на Договорот за добрососедство со Бугарија.

- Никаде во светот нема некој да биде против пријателство и добрососедство,. Нашиот народ тоа нема да го поддржи. Убеден сум дека нашето пријателство во иднина ќе биде пример, а јас како потписник на договорот испраќам порака до политичарите да го негуваат добрососедството., одговори Заев.