Заев за Франс прес: Блиску сме до решение кое ќе трае со векови со Грција
Објавено во: Македонија 21 Април, 2018
Премиерот Зоран Заев во интервју за Франс прес посочи дека Македонија и Грција никогаш не биле поблиску до наоѓање на решение за долгогодишниот спор за името, но и процесот да не заврши успешно нема да биде крајот на светот.
„Верувам дека никогаш не сме имале подобри околности за постигнување целосно решение, кое ќе трае со векови, засекогаш. А ако спорот не се реши, нема да биде крај на светот”, изјави Заев.
Тој додава дека Македонија ќе ја продолжи европската програма на овој или оној начин и дека „ќе ја донесеме Европа во Скопје”.
Македонскиот премиер изјави и дека е задоволен што „голем дел од прашањата” меѓу Македонија и Грција се решени дека е оптимист за финалното решение, но одби да открие детали од преговорите, бидејќи „тоа може да го уништи целиот процес“.
Заев како „порака наза отворени врати” го гледа Извештајот на Европската комисија, но додаде дека тоа не значи дека Македонија не треба да ги подобрува односите со другите земји, вклучувајќи ја и Русија.
„Сакам да ја подобриме соработката со Русија. Но, Русија треба да знае дека за нас нема алтернатива за НАТО и ЕУ. Ние ќе останеме фокусирани на тој пат. Тоа е наше апсолутно право, наше очекување и таму ја гледаме иднината на земјата и на нејзините граѓани”, изјави Заев за Франс прес.