ЗАГРИЖУВАЧКИ ТЕНДЕНЦИИ: Паѓа извозот!

Добивај вести на Viber

Падот на извозот е загрижувачки. Во април, во споредба со април лани изнесува 24 отсто, објави Државниот завод за статистика. Намален е и вкупниот обем на трговската размена на земјава за 18,8 отсто во однос на истиот месец лани. Минусот кај увозот изнесува 15,3 проценти. Неодамна за Фактор, универзитетскиот професор Марјан Петрески, го коментираше намалувањето на трговската размена во првото тримесечие. Вели дека може да се должи на три сегменти. „Првата е големиот раст на извозот и увозот минатата година, главно поттикнат од работата на странските фабрики, што условува висока споредбена основа. Забавување на растот на трговската размена, па дури и нејзиното намалување може да значи дека растот минатата година бил над својот потенцијал. Втората тенденција е сеуште потиснатата побарувачка на странските пазари, односно попрецизно кажано, отсуството на посериозни знаци на пораст на надворешната побарувачка. Третата тенденција се опаѓачките цени на некои производи кои имаат значаен удел во нашиот извоз, првенствено металите, особено во месеците февруари и март. На крајот, секако, не би сакал да исклучам дека и политичката конотација во која се наоѓаме врши одредено влијание врз сентиментот на производителите, иако според последните податоци од Државниот завод за статистика, деловните тенденции во преработувачката индустрија бележат подобрување во првите три месеци од годинав, вели универзитетскиот професор Марјан Петрески.