ЗАКОНОТ ПРЕДВИДУВА ТРИ ГОДИНИ ЗАТВОР: Левица поднесе кривична против Нина Ангеловска

Добивај вести на Viber

Левица денеска до Основното јавно обвинителство поднесе кривична пријава против eкс министерката за финансии, Нина Ангеловска за Еуростандард банка, бидејќи додека била на функција, злоупотребувајќи инсајдерски сензитивни информации го повлекла својот депозит од 250.000 евра. 

Тоа се случи непосредно пред банката да пропадне, со што ја искористила службената положба за остварување лична корист и се поставила во привилегирана и фаворизирачка позиција во однос на останатите доверители.

„Со ваквото умислено и противправно однесување пријавената го прекршила член 50 од Законот за спречување на корупција и судир на интереси со што се исполнети условите за кривичен прогон по службена должност за сторено тешко кривично дело Несовесно работење во службата“, вели членката на Президиумот на Левица, Јована Мојсоска. 

За ова кривично дело е предвидена затворска казна од три години како јавен деликт насочен против службената положба. Банката пропадна во месец август. Во ноември годинава лидерот на Левица, Димитар Апасиев ги праша надлежните дали водат некаква постапка за Ангеловска за овој случај. 

Тоа беше едно од прашањата кои ги постави  Апасиев на Надзорната расправа за пропаднатата Еуростандард банка до јавниот обвинител Љубомир Јовески. Јовески тогаш рече дека обвинителството ќе преземе дејствија, и оние кои сториле кривично дело ќе одговараат. 

Антикорпуциска отвори постапка, но утврди дека кај неа нема кривична одговорност.