Занаетите во Македонија изумираат, а во Германија се темел на економијата

Добивај вести на Viber

Традиционалните занаети во Македонија одат во заборав, поради слабиот интерес кај помладите генерации да ги наследат вештините за нив. Главна причина за ова е слабата исплатливост, но и сивата економија, која го уништува занаетот, вели Весна Симова, претседателка на Македонската занаетчиска комора. Владата се обидува да ги заштити занаетчиите и да им овозможи подобри услови за работа, тврди вицепремиерот за економски прашања Владимир Пешевски. „Планираме и во иднина силна поддршка преку проект за олеснување на процедурите за занаетчиите, преку програмата за вработување која е насочена кон занаетчиските дејности. Континуирано работиме и на изготвување на низа законски решенија во оваа област. Занаетчиството е комплементарно и со други дејности, особено со туризмот кој во последно време зема замав и има голем потенцијал“, вели Пешевски. Искуството на Германија покажува оти доколку правилно се развива, занаетчиството може да биде цврст темел на економијата на една земја. Тоа што го прави особено атрактивно занаетчиството во Германија е растот на извозот во последните години. „Успехот на германското стопанство се темели врз јакото малостопанство и голем дел од малото стопанство е всушност занаетчиството. Се обидуваме да го поддржиме занаетчиството и во Македонија, бидејќи тоа е битен дел за економски развој“, вели координаторката од Германија на Балканската канцеларија за малостопанство и занаетчиство. Сепак, недостигот на квалифициран кадар, особено меѓу помладите генерации, претставува проблем и во европските земји, а не само во Македонија.