Започна судењето на Мерко за незаконско поставување директори
Објавено во: Македонија 20 Јуни, 2024
Денеска започна судското рочиште против струшкиот градоначалник Рамиз Мерко за незаконско поставување на директори во основното училиште „Гоце Делчев“ во село Подгорци.
Првообвинетиот рече дека разбира за што е обвинет, но додаде дека не се чуствува виновен бидејќи направил континуитет во работата на основните училишта.
Тој е обвинет за незаконско поставување на директори во основни училишта во селата Подгорци, Лабуништа и Велешта и во „Браќа Миладиновци“ во Струга. Три предмети се споени, додека за училиштето во Велешта се води посебен предмет оти има повеќе обвинети, кои се товарат за „Несовесно работење во службата“, а дел од нив се гонат и за кривичното дело „Фалсификување исправи“.
Мерко се товари од Обвинителството за несовесно работење во службата. Исказ даваше Аден Ајдарсоски, кој три мандати директорувал во училиштето во Подгорци, но не исполнувал услови оти немал пет годишно работно искуство. Државниот просветен инспекторат извршил надзор во училиштето во Подгорци. Го известил директорот за неговото незаконско именување на функцијата, но не повел постапка.
„Ние имаме докази и тоа ќе го докажеме. Ќе докажеме дека се сторени такви кривични дела. Судот ќе одлучи колку ќе осуди, тоа ќе го видеме во текот на постапката. Ако не се согласиме со пресудата ќе поднесеме жалба до Апелациониот суд“, вели Џемал Лога, јавен обвинител од Струга.