ЗАСТАРЕ „ТРАЕКТОРИЈА“ - Повлечено обвинението против Груевски, Георгиевски, Пешевски и Јанакиески

Добивај вести на Viber

По измените на Кривичниот закон, кои неодмана беа изгласани во Собранието, и за кои се крена голема „бура“, денеска од кривична постапка се спасуваат Владимир Пешевски, Миле Јанакиески, Љупчо Георгиевски и Никола Груевски. 

Со денешнат одлука запре кривичната постпака за случајот „Траекторија, а како што посочуваат од Основниот Кривичен суд Скопје, тоа е резултат на предлогот на Јавното обвинителство и измените на Кривичниот законик.

- Имајќи го предвид предлогот на ЈО и измените на КЗ, Судот донесе решение, се запира кривичната постапка против обвинетите Владимир Пешевски, Миле Јанакиески и Љупчо Георгиевски за „злоупотреба на службена положба и овластување“, како и обвинителниот предлог против Никола Груевски за кривично дело „примање награда за противзаконито влијание“ - рече претседателот на Судечкиот совет, судијата Илија Трпков.

Ова решение следува по предлогот на ЈО, кој, пак, следува по измените во Кривичниот законик, а трошоците на постапката, согласно денешното решение, паѓаат на товар на државата.

Обвинителката Лиле Стефанова на денешното рочиште побара обвинението против обвинетиот Никола Груевски да биде повлечено поради настапување на апсолутна застареност, а постапката за другите тројца обвинети да запре поради измените во КЗ.

Случајот се однесуваше за постапката за избор на компанија за изградба на автопатиштата Миладиновци – Штип и Кичево – Охрид познатата како „Траекторија“. Според обвинението, обвинетите во втората половина на 2012 година и во текот на 2013 година презеле повеќе дејства со кои во постапката за избор на компанија за изградба на автопатиштата Миладиновци – Штип и Кичево – Охрид ги искористиле и ги пречекориле своите овластувања. Со тоа му нанеле штета на буџетот од најмалку 155 милиони евра.

Случајот го води судијата Илија Трпков, а застапник на обвинението е обвинителката Лиле Стефанова.