Заврши првата фаза од големиот еко-проект на Шпаркасе Банка „Рециклирање? – „КАЖИ ДА!“

Добивај вести на Viber

Во Винарија ‘‘Дудин‘‘ во Неготино, беше одбележан крајот на првата фаза од големиот еко-проект за едукација на децата на возраст од 6 до 14 години за рециклирање, инициран од Шпаркасе Банка и спроведен во соработка со Министерството за образование и наука и Друштвото за управување со пакување и отпад од пакување Пакомак.

Шпаркасе Банка заедно со партнерите во проектот доделија награди на основните училишта кои собраа најголема количина на отпад за рециклирање како и пофалници за сите училишта учесници.

Наградени се три училишта од следниве скопски општини: општина Карпош, ОУ ‘‘Вера Циривири Трена‘‘, општина Кисела Вода, ОУ ‘‘Круме Кепески и ОУ ‘‘Крум Тошев‘‘ од општина Гази Баба.

На настанот присуствуваа претставници од 34 училишта, претстваници од Шпаркасе Банка и Пакомак, и претставници од општините кои беа вклучени во првата фаза на овој проект.

„Проектот Рециклирање? – „КАЖИ ДА!‘‘ со кој Шпаркасе Банка повикува ‘‘За околината вреди да се штеди‘‘ е долгорочен проект чијашто прва фаза заврши. Многу ни е драго што учениците го прифатија нашиот проект и активно учествуваа. Нивниот труд е награден. Во втората  фаза ‘‘Најактивно еко училиште‘‘ ќе бидат вклучени и училишта низ Македонија од општинитеод Охрид, Битола, Штип и Струмица со што очекуваме уште поголема масовност на нашиот проект за едукација на децата за потребата за чиста и здрава животна средина‘‘, изјави Кристина Депо, Директор за маркетинг и комуникации на Шпаркасе Банка Македонија.

Целта на проектот е едуцирање на децата за потребата и придобивките од собирањето отпад  и неговото рециклирање, нивно мотивирање за што помасовно вклучување како и обезбедување на средства за понатамошни еколошки активности во училиштата.

Проектот промовира индивидуална и заедничка одговорност за намалување на отпадот и ја зголемува свесноста за важноста од здрава и чиста животна средина. Во текот на проектот, учениците собираат отпад од пакување, хартија и пластика. На крајот на секоја фаза, Шпаркасе Банка ги наградува училиштата кои собрале најмногу отпад.

Шпаркасе Банка Македонија ја продолжува својата стратешка определба да бида активен учесник во развојот и унапредувањето на различни сегменти на општеството. Годинава планирани се повеќе општествено одговорни проекти во различни области и во соработка со повеќе институции, невладини организации и партнери, меѓу кои се и оние за развој на најмладите, екологијата, образованието, но и спортот, културата, филмската уметност и др.