Здравството збогатено со ново возило – мобилна гинеколошка амбуланта

Добивај вести на Viber

Македонското здравство се збогати со уште едно возило, мобилна гинеколошка амбуланта за сексуално и репродуктивно здравје која беше промовиранаа во кругот на Министерството за здравство.

Идејата е ова возило во кое има гинеколошки стол, Ехо апарат, клима уред, агрегат за електрично напојување треба да помогне за преглед на жените во тешко достапните  рурални места. Во неа ќе се прави  ПАП тест, основен гинеколошки основен преглед, ехо, а ќе се делат и совети за сексуално преносливи инфекции и бесплатна контрацепција.

Според министерот за здравство, Никола Тодоров жените од руралните места обично не прават гинеколошки прегледи и потоа доаѓаат директно во терцијарно ниво како многу тешки здравствени случаи, што пак финансиски го оптеретува системот.

„Имајќи ги предвид овие работи се одлучивме за еден ваков проект кој постои и во други земји во Европа. Очекуваме да има интерес и сите жени особено оние во репродуктивен период, да пристапат и на еден добар начин да гледаат на овој проект и да се приклучат кон нашата идеја за подобра и пошироко опфатена превенција. Проектот чини околу 300.000 евра. Набавката на ова возило е околу 40 илјади евра и оди преку грант од Глобалниот фонд кој е обезбеден до невладината организација ХЕРА“, информираше Тодоров.

Според најавите, во првата фаза ќе се реализираат активности во шест општини-Гостивар, Тетово, Куманово, Делчево, Струмица и Охрид, а до крајот на оваа година околу 500 клиентки ќе добијат пакет од гинеколошки услуги и бесплатна контрацепција.