Зголемување на минималната и просечната плата - најави Николовски од Делчево
Објавено во: Економија 12 Ноември, 2016
Зголемување на минималната и просечната плата, најави од Делчево Љупчо Николовски, носителот на кандидатската листа на изборната единица од опозициската коалиција на СДСМ.
Тој пред граѓаните на Делчево ги промовираше дел од економските мерки предвидени во „Планот за живот на Македонија“, со цел подобар живот на граѓаните. Николовски вели дека партијата ќе се сконцентрира на платите.
„Ќе ја покачиме минималната плата во првите 4 месеци на 12.000 денари, а до крајот на мандатот на 16.000 денари. Наш фокус, наша цел е просечната плата во државата да биде 30.500 денари. Тоа ќе го направиме со низа на мерки за подобар живот на секој граѓанин тука во Македонија. Не само што ќе се зголемуваат платите на граѓаните, туку ќе се намалуваат и трошоците на секое семејство“ - кажа Николовски.
Објасни дека владата на СДСМ ќе ја укине радиодифузната такса и ќе ја врати евтината електрична енергија секој викенд и дополнително два часа секој друг ден во неделата. Кажа дека ќе имаат многу мерки за вработување на младите, но и за покачување на пензиите.