ЖИТЕЛИ НА МАВРОВО – РОСТУШЕ ЗА ЗЕМЈОТРЕСОТ: Се нишаа бандери, објектите се поместуваа, ќерамидите скокаа

Добивај вести на Viber

Имам 46 години и досега вакво нешто не сум видел, вели Александар Костиќ, претседател на месната заедница во селото Галичник.

Раскажува дека глетката била страшна при двата земјотреси со јачина од 4.9 степени, но за среќа траеле кратко, и нема поглеми штети. Дополнително имало и повеќе афтершокови.

„Тоа е нешто што прв пат го доживеавме. За среќа беше кратко и траеше неколку секунди. Се нишаа бандери, објектите се поместуваа, ќерамидите скокаа. Луѓето создадоа врева. Има мали штети кај постарите и габаритни куќи. Некои од нив имаат и повеќе од 100 години. Онаму каде имало пукнатини тие се прошириле. Имало пукнати стакла од прозорци, искршени чаши внатре, поместен мебел од земјотресот, паднати плочки во бањите. Кога се случи земјотресот имаше и туристи кои се затекнаа на местото и се чудеа што се случува. Вакво нешто на отворен простор досега не сме виделе. Водата беше заматена, но ни беше објаснето дека за 2-3 дена ќе се прочисти и дека е тоа природен процес“, вели Костиќ.

Тој додава дека на патот Галичник – Маврово имало одрон кој е расчистен и сообраќајот се одвива непречено.

Слично е и во другите села во истата општина.

„Мали штети има во две куќи, во една куќа паднал оџак, а и по викендиците има мали напукнувања. Земјотрес од 5 степени не е малку и вакво нешто ние досега не сме виделе“, рече Чеде Анастасиевски, претседател на месната заедница во селото Никифорово.

Дарко Дамјановски од селото Маврово раскажува дека 15-тина објекти имаат мали штети од потресите кои деновиве се случија.

„Има оштетувања на постарите куќи. Луѓето се исплашија и нормално е да реагираат при силен земјотрес“, додава тој.

Од Општината Маврово – Ростуше ќе направат увид на терен.

На 11 ноември имаше две потреси од 4.9 степени во околината на Маврово.

Потоа имаше серија послаби потреси. Слаби земјотреси ги стресоа Центар Жупа, Дебар и Ростуше.