ЗОНА М1 РАДИО: Забраната на ЗАМП ни донесе загуби на слушаноста и нарушен углед

Добивај вести на Viber

Загубите од забраната на ЗАМП за емитување на македонска, па и српска музика на македонските радио и ТВ станици почна да ги коси профитите на дел од македнските музички формати.

Дел од радио станиците во главниот град се жалат на нарушен имиџ и загуби од слушаноста.

„Премногу негативно се одразува забраната од ЗАМП за нас како музички формат на радио, слушателите се жалат на нас, клиентите ни откажуваат соработка, а нашите радио водители веќе еден месец си седат дома. Ни се наруши имиџот кој 20 години макотрпно го градевме и инвестиравме. Имаме огромни загуби од слушаноста, а нашите водители се принудени да се седат дома“, велат од ЗОНА М1 Радио за фактор.

Ова радио е познато по турбо фолк музиката овозможувајќи и на публиката да ужива во најновите домашни и ју хитови, од Цеца и Северина па се до Васка Илиева и Ефто Пупиновски.

Од ЗОНА М1 РАДИО сметаат дека одлуката на ЗАМП е неправилна.

„Македонската музика е нашиот идентитет, кој што ние медиумите и цела Македонија го плаќа, македонската песна никогаш не била забранета во историјата на оваа планета. 

11 Октомври бевме принудени да го поминеме без македонска музика, ѕвезденото небо на Тоше Проески несмеевме да го возвеличиме со македоснка музика. Ова е срам и безобразлук, а од друга страна не е ни фер, како може да се забрани само на телевизиите и радијата, а на јавните настани не“, додаваат од ЗОНА М1 Радио.

Наше мислење е дека никој не ги ни штити авторските права, гледате и сами колку копии има низ цел свет, а овие нашите се глумат демек штитат нечии права. Тие ги штитат само нивните џебови. ЗАПМ никаде во светот не треба да постои, можеби само некое регулативно тело да се знае кој е автор на тоа дело и  толку, секој изведувач го има платено тоа дело на авторот и што треба понатака да му се исплаќа дури и по 70 години за тоа дело? Па што да кажеме за народните херои што го полоќиле и животот свој, па тие треба илјадници години да имаат благодет“, порачуваат од ова скопско радио.

Најверојатно и забраната за пуштање на хрватска музика, која треба да стапи на сила од понеделник силно ќе ја погоди публиката на ЗОНА М1 радио имајќи го предвид фактот дека на нивната фрекфенција најчесто можеа да се слушнат хитовите на Северина.

Ирена Ставрова