Има ли подобро платени? Кои тројца банкари поделија еден милион евра?

Добивај вести на Viber

Костов, Илоски и Стевкова – Штериева поделија 1,02 милиони евра (бруто) за плати, награди, надоместоци и други фиксни и варијабилни надоместоци во годината во која „Комерцијална банка“ ја има рекордната добивка. Во 25 годишната корпоративна историја ова е најдобро платениот банкарски тим

„Комерцијална банка“ повторно покажа дека е штедар работодавец освен што е дарежлив делител на дивиденда на своите акционери. Тројцата членови на управниот одбор: главниот извршен директор Хари Костов, главниот оперативен директор Илија Илоски и главниот финансиски директор Маја Стевкова – Штериева поделија меѓусебно 1,02 милиони евра (во бруто износ) по основ на плати, награди, надоместоци и осигурување. Лани под водство на ова искусно банкарско трио најголемата домашна банка според актива и единствената доминантно-домашно поседувана банка направи профит што надмина 30 милиони евра што е најдобриот резултат во историјата на оваа деловна банка.

Официјалните податоци достапни во годишниот извештај за работењето на „Комерцијална банка“ за лани покажуваат дека наградата на топ триото лани е повисока за 143.000 евра во споредба со 2019 година кога изнесувала 876.000 евра. За резултатот што го остварија лани Костов, Илоски и Стевкова-Штериева од банката се наградени со 143.000 евра (тоа е 16 отсто повеќе од 2019 година) и вкупно за нивните услуги банката плати над еден милион евра.

Во извештајот пишува дека износот исплатен на тројцата директори се состои од фиксен дел за кој се исплатени 600.000 евра и варијабилен дел во износ од 420.000 евра.

Според официјални достапни податоци до кои има пристап редакцијата на „Фактор“ , а се објавувани во годишните банкарски извештаи, ова најголемиот износ за исплатени средства за плати и награди на врвни менаџери во 25 годишната корпоративна историја на Македонија.

Во годишниот извештај нема податоци за тоа колку поединечно добил секој од тројцата членови на Управниот одбор на банката, но повеќе од сигурно е дека најмногу средства поединечно се исплатени на долгододишниот прв човек на банката Хари Костов.

Костов освен што е долгогодишен прв човек на најголемата македонска деловна банка воедно е и еден од пионерите менаџери во воспоставување на добри корпоративни практики затоа што во контиунитет вложува средства во акции на „Комерцијална банка“.

Вкупно за плати, награди, регрес, отпремнини, менаџерско осигурување, обуки, јубилејни награди и дрги видови поддршка на сите свои вработени лани банката им исплатила над една милијарда денари (16,87 милиони евра).