Македонија нема да учествува на „Евровизија“, трошоците и високите сметки за струја главна причина за откажувањето
Објавено во: Македонија 14 Октомври, 2022
Македонија го откажа учеството на Евровизија 2023 година која ќе се одржи во мај во Ливерпул, Велика Британија, пишува порталот „ММС“, чии извори велат дека одлуката е донесена поради кризата, односно големите сметки за струја кои ги добива националниот сервис, но и воопшто високите цени во Велика Британија.
Информацијата ја потврди и директорот на МРТВ, Марјан Цветковски кој вели дека за првпат по осамостојувањето, нашата земја нема да биде дел од најголемата музичка манифестација во Европа.
- Да, да нема да учествуваме на Евровизија. Не сме платиле котизација. Најголем проблем се струјата и големите трошоци, кои ќе ги предизвика патувањето и престојот во Велика Британија. Поради оваа состојба скратени се сите трошоци, па така и овие кои требаше да се платат за учество на Евросонг, ги насочивме за плаќање струја - вели Цветковски за „ММС“.
Македонија нема да учествува на оваа голема музичка манифестација за првпат од своето осамостојување.
Од 1991 година до денес земјата не учествуваше неколку пати поради неисполнување на пропозициите на ЕБУ или не успеа да се пласира во финале.
Најголем успех за нашата земја постигна Тамара Тодевска во Тел Авив во 2019 година, која се пласираше на 7-то место. Во 2020 година поради коронавирусот Евросонг не беше натпреварувачки, а учеството во 2021 и 2022 година со Васил Гарванлиев и Андреа предизвика скандал, па МРТВ беше критикувана и често се коментираше да се откажеме од учеството.