1ТВ смета дека снимката со Боки 13 е протечена од Обвинителството

Добивај вести на Viber

1ТВ, телевизијата чиј сопственик е Бојан Јовановски познат како Боки 13, коментирајќи ја видео и аудио снимката која ја објави извесната ЛаВерита од Милано на која се гледа како тој и Зоран Милевски изнесуваат торби од куќата на бизнисменот Орце Камчев, смета дека материјалите се изнесени од Основното јавно обвинителство, но и дека не е целосно автентична.

„Водејќи се од начелата на редовно информирање 1тв.мк го објавува видео записот кој отвора и прашање, како и зошто вакви материјали кои евентуално би требале да послужат како доказ за обвинение од ОЈО, и се релевантни, би протекле од архивите на Обвинителството за гонење на организиран криминал.

Снимката освен банкноти од евра и запис како заедно Јовановски и Кичеец  ја напуштаат куќата на осомничениот во случајот „Империја“, го нема документирано клучниот момент на наводното предавање на пари. Исто така симптоматично е тоа што парите се снимани со телефонска камера каде што не стои дата и саат, за разлика од вториот дел каде што од приватните камери на осомничениот во „Империја“ се гледа напуштањето на куќата а во нив има саатница и датум“, коментира 1ТВ.

Засега не е познато од каде италијанскиот весник ја добил снимката. Македонските власти досега не се огласија со реакција за случајот. Основното јавно обвинителство до сега се нема огласено да потврди дали снимката е од кај нив, или не.