Да се дефинира каде може, а каде не смее да се градат фабрики!

Добивај вести на Viber

Неколку еколошки друштва поднесоа иницијатива за дополнување на Законот за животна средина, во која се бара ограничување или дефинирање на растојанието на кое се врши градба на нови индустриски капацитети, зависно од типот на индустријата, како и потенцијалното загадување кое соодветната фабрика го предизвикува. „Накратко, бараме јасно разграничување каде може, а каде не може да има тешка индустрија“, стои во соопштението на „Еко-Скоп“ од Скопје, „Вила Зора“ од Велес, „Грашница” од Охрид и „Молика” од Битола кои започна со реализација на проектот „Да ја заштитиме нашата иднина“. Целта на иницијативата е да се забрани градење тешка индустрија во близина на населените места и заштитените подрачја, со што ќе се спречи повторување на грешката од Велес. Сепак, стои во соопшението,  негативното искуство од Велес, создава негодување кај граѓаните кога станува збор за градење на било каков индустриски капацитет во близина на населено место, поради страв од потенцијално загадување. Затоа, објаснуваат дека со просторното планирање и одделувањето на растојанието на кое може да се гради еден индустриски објект ќе се создаде сигурност за населението дека објектот ќе биде изграден на сигурна дистанца, како и сигурност за инвеститорот дека на соодветната дистанца нема да има проблем од локалното население. Екологистите уште еднаш повторија дека се против рестартирање на Топилницата во Велес на старата локација и им дадоа целосна поддршка на велешани во нивната борба против загадувањето.