Ахмети: Храбро ќе продолжиме и кон решавање на спорот со името

Добивај вести на Viber

Лидерот  на Демократската Унија за Интеграција, Али Ахмети го поздравува денешниот Извештај за напредок објавен од високата претставничка на ЕУ, Федерика Могерини и комесарот Јоханес Хан во Брисел, со посебен акцент на безусловната Препорака за почеток на разговорите со Европската Унија, информираше кабинетот на Ахмети.

„Реформското парламентарно мнозинство успеа да ги исполни итните очекувања на официјален Брисел, на меѓународните пријатели и на граѓаните, но не застануваме тука. ДУИ вети дека ќе продолжи со реформите и за зајакнување на напорите за целосно владеење на правото како и за борба против корупцијата и организираниот криминал. Храброста за решавање на отворените прашања се наградува, затоа храбро ќе продолжиме во периодот пред нас и кон решавање на спорот со името како наша последна пречка кон ЕУ и НАТО“ – вели Ахмети.

Тој изрази задоволство од реализацијата и напредокот на системските реформи во земјата, што денеска беше награден од Брисел, но додаде дека има уште работа за добивање на датум за почеток на преговорите со ЕУ.

Од веста која денеска беше објавена е презадоволен и премиерот Зоран Заев, и тој вети дека и понатаму ќе работат.