АКЦИОНЕРИТЕ НА НЛБ ГО ОТВОРИЈА ШАМПАЊСКОТО - Банката пресече: Ќе се дели дивиденда од 34 милиони евра, еве кој колку ќе добие на конто

Добивај вести на Viber

НЛБ Банка држи лекции по тоа како може да се работи и профитабилно и домаќински, и да се делат одлиични дивиденди за акционерите, но и дел од добивката да се задржи за инвестиции во банката.

Акционерите на НЛБ Банка вчера го одржале редовното годишно Собрание, а на него донеле неколку важни одлуки, меѓу кои за акционерите секако дека е најинтересна онаа за распределбата на добивката остварена во минатата година, која беше и повеќе од одлична, како и за износот на дивиденда што тие ќе го добијат.

Па така, како што е познато, НЛБ Банка минатата година оствари фантастична добивка од близу 40 милиони евра, или прецизно 39,6 милиони евра.

Од овој профит, за исплата на дивиденди ќе отиде позначаен дел, односно 28 милиони евра, или точно 27,7 милиони евра.

Оваа одлука ја донело Собранието на акционери на својата вчерашна седница, а за тоа беше информирана денеска инвеститорската јавност преку Македонската берза.

Покрај за дивиденда, од ланската добивка ќе се издвојат и близу три, односно 2,9 милиони евра за задржана добивка за инвестициски вложувања, како и близу 9 милиони евра кои ќе одат во општ резервен фонд.

Но, оваа сума од околу 28 милиони евра како дивиденда не е единствената што ќе ја земат акционерите на НЛБ Банка. Тие имено, ќе добијат дивиденда и од дел од акумулираната добивка од 2021 година, која била на вкупна сума од 12,1 милиони евра, од кои пари како дивиденда ќе завршат 6,1 милиони евра, а остатокот ќе биде за општ резервен фонд.

Тоа значи дека акционерите на НЛБ Банка ќе добијат вкупна дивиденда од 33,8 милиони евра, што се добива ако се собере предвидениот износ за дивиденда од 27,7 милиони евра од ланската добивка, како и 6,1 милиони евра од акумулираната добивка од 2021 година.

Во моментов доминантен и единствен сопственик кој поседува над 5 отсто од акциите во НЛБ Банка е Нова Љубљанска банка АД Љубљана, која поседува 86,97 отсто од акциите во НЛБ Банка.

Тоа значи дека кај словенечката банка која е мајка на нашата НЛБ Банка, во форма на дивиденда ќе завршат 29,4 милиони евра во форма на дивидена.

Покрај главниот акционер од Љубљана, во НЛБ Банка има и многу домашни физички и правни лица кои се акционери, и тоа 123 домашни правни лица, односно фирми или банки, кои поседуваат вкупно 30.324 акции или 3,55 отсто, како и 906 домашни физички лица, кои располагаат вкупно со 77.178 акции или 9,04 отсто.

И странски физички лица кои се 17 на број поседуваат акции од НЛБ Банка, и преку нив држат 0,2 отсто од капиталот.

А покрај Нова Љубљанска, уште пет други странски правни лица имаат акциии во НЛБ, но и нивниот сопственички процент е ситен.

Притоа, од банката ги информираат сите овие акционери дека бруто износот на дивидендата по акција е 2.431 денар.

Тоа значи дека сите овие акционери имаат причина за радост, бидејќи ќе земат одлична дивиденда согласно со бројот и процентот на нивните акции.

Исплатата на дивидендата ќе почне 30 ден по одржувањето на Собранието на акционери.

Притоа, треба да се спомене дека акцијата на НЛБ Банка е една од најтргуваните и најбараните акции на берзата, токму поради одличната заработка која ја нуди оваа хартија од вредност.

Н.Н.Ф.