Ако ВМРО-ДПМНЕ не формира влада ќе бара нови избори

Добивај вести на Viber

Додека се чека на конечна одлука од Али Ахмети дали ДУИ ќе прифати коалиција со ВМРО-ДПМНЕ, од поддржувачите на досегашната владејачка партија посочуваат дека ако не се формира нова влада тогаш мора да се оди на нови избори.

„Мислам дека нема да се дозволи некој што не победил на избори да дојде на власт и оттука единственото решение е спроведување на нови парламентарни избори“, вели Даштевски за провладините медиуми.

Исто така и провладиниот аналитичар Тони Науновски посочува дека ако мандатарот не формира параламентарно мнозинство тогаш треба да се распишаат нови избори. 

„Ако не се формира влада според уставните интерпретации на професорите по уставно право, тие велат дека ако мандаторот од било какви причини не успее да формира парламентарно мнозинство се распишуваат нови избори. Тоа е единствената правна интерпретација на уставот“, смета Науновски.

Во јавноста кружат голем број на шпекулации околу тоа каква разврска ќе има меѓу ВМРО-ДПМНЕ и ДУИ особено што од двете партии нема конечни информации, па толкувањата се дека ако не биде постигнат договор мандатот во тој случај да не падне во рацете на Заев за тој да добие шанса да преговара за формирање на нова влада. 

Дел од раководството на ДУИ потенцираше и дека еден од условите е да не се дозволи осомничени функционери на ВМРО-ДПМНЕ да бидат дел од новата влада што индиректно значи дека Груевски не смее да биде нов премиер, па дури има и прогнози дека Никола Попоски или некој друг од партијата би бил иден мандатар. 

Секако, на ваквите ставови се спротиставуваат аналитичарите кои сметаат дека тоа е надвор од сите меѓународни конвеценции.