АКТЕРКАТА СТОЈАНОВСКА ОСЛОБОДЕНА ОД ТУЖБА ЗА ШВЕРЦ НА КОКАИН, ќе бара надомест за нарушен углед
Објавено во: Македонија 07 Септември, 2022
Актерката Силвија Стојановска денеска доби ослободителна пресуда. По првичното судење во кое Стојановска доби 3,6 години затвор, сега на барање на Апелација, Кривичниот суд донесе осолободителна пресуда за делото за кое ја товареа, шверц на кокаин.
Адвокатот на Стојановска, Димитар Савовски за медиумите потенцираше дека со оваа одлука правдата е задоволена и посочи дека обвинителство немало докази дека актерката е виновна за производство, дистрибуција и организирање мрежа на продавачи и посредници за запленетите 700 килограми кокаин во Шпанија.
- Такви докази обвинителството не приложило и наместо 3,6 години затвор како во претходната пресуда, актерката денеска од судечкиот совет доби ослободителна пресуда на повтореното судење - посочува адвокатот и додава дека несреќата во овој случај е врската со нејзиниот бивш брачен другар и за жал, тврди тој, таа брачна врска била единствен аргумент на обвинителството кое не успеало да го докаже кривичното дело и обвинението.
- По насоките на Апелациониот суд, кој ја укина првостепената пресуда, не можеше да се очекува поинаква одлука освен ослободителна пресуда. Судот ги уважи сите жалбени наводи. Во повторената постапка не се изведоа нови докази, а од доказите кои ги приложи обвинителството не можеше да се утврди вина кај Силвија Стојановска, односно дека членувала во таква меѓународна група која се занимава со трговија на дрога - вели Савовски.
Тој додава дека Стојановска била обвинета само затоа што била сопруга на првообвинетиот Воислав Будисављевиќ.
- Ова во завршниот збор го кажа и обвинителката, дека Стојановска била обвинета затоа што била сопруга на Будисављевиќ и снаа на неговиот брат и дека поради тоа таа морала да знае што работи бившиот сопруг и неговиот брат. Обвинителката не изврши анализа на доказите, туку ја презентираше биографијата на браќата Будисављевиќ - додава Савовски.
Претходно Апелациониот суд донесе одлука да го врати на повторно судење предметот во кој актерката Стојановска со првостепена пресуда беше осудена на три и пол години затвор поради делото кое и се става на товар, шверц на 700 килограми кокаин од Колумбија во Шпанија.
Адвокатот во изјава за медиумите посочи дека актерката ќе бара надомест поради нарушен углед.
- Апсолутно има право на надомест поради нарушен углед, за изгубена добивка и што не, но за жал, нашата извршна власт, Министерството за правда, не е спремно да се спогодува по овие прашања.. Апсолутно ќе бараме - рече Савовски.
Првоовинетиот во делото шверц на 700 килограми кокаин, Воислав Будисављевиќ, кој беше првостепено осуден на 7 години затвор, поднесе жалба за пресудата, но, апелација нему му ја зголеми казната на 12 години затвор.