Албанија дозволи влез со полн резервоар гориво, укината забраната за македонските камионџии
Објавено во: Економија 25 Ноември, 2012
„Овој режим на контрола на горивото во резервоарите што важеше на граничниот премин Ќафасан, превозниците го оценија како нестандардна мерка за нееднаквост на цените на производите кои се превезуваат. Заемните напори на повеќе државни институции вродија со плод и од 23 овој месец е укината забраната, со што товарните возила ќе можат да влегуваат на територија на Албанија со полни фабрички вградени резервоари“ истакна портпаролот на Минисетрството за транспорт и врски, Драган Симоновски.
Како што посочија од Министерството за транспорт и врски, укинувањето на забраната за влез на македонските превозници на стока во Република Албанија со повеќе од 200 литри гориво во фабрички вградените резервоари ќе овозможи поефикасно работење на транспортните компании, но и заштеда на средства, пред се заради фактот што македонските превозниците од Албанија немаат можност да го вратат платениот износ за ДДВ, а и цената на горивото е повисока за 1,8 центи по литар. Освен последната, како други поволности за транспортерите од министерството за транспорт и врски ги споменуваат и укинување на режимот на транспортни дозволи со повеќе земји со кои Република Македонија остварува економска размена, утврдување дополнителни дозволи онаму каде што е констатиран дефицит и намалување на нелојалната конкуренција, односно на дивиот превоз.