АНБ СО ОГЛАС БАРА ОСУМ КАДИДАТИ ЗА ВРАБОТУВАЊЕ - ова е прв пат од основањето, еве ги деталите

Добивај вести на Viber

Агенцијата за национална безбедност преку оглас бара нови кандидати кои ќе ја гарантираат безбедноста на државата. 

Како што истакнуваат од оваа институција, за прв пат од основањето објавуаат оглас. 

- Агенцијата за национална безбедност за првпат од своето основање објави јавен оглас за вработување, отворајќи ја вратата за сите компетентни и мотивирани граѓани кои сакаат да бидат дел од институција со клучно значење за безбедноста и стабилноста на државата.

Ова претставува историски чекор во насока на транспарентноста и инклузивноста, кој ја потврдува определбата на Агенцијата да ги следи највисоките стандарди во процесите на човечки ресурси и да им даде можност на сите граѓани што ги исполнуваат критериумите да станат дел од професионален тим посветен на заштита на националните интереси - се нагалсува во соопштението од АНБ до медиумите. 

Јавниот оглас се однесува на засновање на работен однос на неопределено време за вкупно осум извршители. 

Заинтересираните кандидати треба да ги исполнуваат општите и посебните услови утврдени за конкретните работни места, при што се очекува висок степен на стручност, одговорност и интегритет.

Образецот за аплицирање е достапен на официјалната веб-страница на Агенцијата за национална безбедност - www.anb.gov.mk во делот „Транспарентност“.

Од институцијата додаваат дека „со оваа иницијатива, Агенцијата испраќа јасна порака дека отвора ново поглавје во начинот на функционирање, градејќи институционална култура која ги препознава вредностите на компетентноста, еднаквите можности и професионалната етика“. 

- Ова е повик до сите квалификувани граѓани да се пријават и да станат дел од тимот што ја штити безбедноста на нашето општество.

Дополнително, оваа отвореност кон јавноста претставува значаен чекор кон зајакнување на довербата меѓу институциите и граѓаните. Со воспоставување на транспарентни практики во процесот на вработување, Агенцијата за национална безбедност се позиционира како современа, професионална и одговорна институција, подготвена да се соочи со безбедносните предизвици на денешницата со капацитети и кадар кој ги отсликува вредностите и потенцијалот на нашето општество - се нагласува во соопштението на АНБ. 

Директор на АНБ е Бојан Христовски, кој на оваа позиција дојде во октомври минатата година, и за кого се крена голема „фама“ во јавноста околу неговото искуство, исполнувањето на критериумите за поставување на таа позиција, меѓу кои неговиот сертификат за англиски јазик за кој имаше бројни пишувања дека е добиен од непостоечка фирма во соседна Бугарија, но и околу неговото високо образование. 

Фото: Принтскрин/Агенција за национална безбедност