Анкетна комисија да испита како работело СЈО, бараат од ВМРО-ДПМНЕ

Добивај вести на Viber

Oд ВМРО-ДПМНЕ бараат собраниска анкетна комисија за СЈО.

Анкетната комисија би се состоела од претседател и 10 членови, а од ВМРО-ДПМНЕ објаснуваат дека како иницијатори и во согласност со собраниската пракса тие треба да номинираат претседател на оваа комисија, а сите други политички партии во Собранието да делегираат членови.

Пратеничката група денеска до Собранието поднесе предлог одлука за основање на анкетна комисија за утврдување на евентуалното нестручно, несовесно и незаконито работење на СЈО внатре во самата институција.

Предлогот што изјави пратеникот Антонио Милошоски, го поднесуваат затоа што токму Собранието на предлог на Советот на јавни обвинители констатираше дека специјалната јавна обвинителка, Катица Јанева работела нестручно, незаконски и несовесно.

„Анкетната комисија не би се занимавала со било какви обвинителски или судски предмети бидејќи не сака ниту може да биде обвинител ниту судија, но би го утврдувала начинот на материјално и финансиско работење на обвинителството, почитување на постоечките законски процедури и деловодници внатре во самото обвинителство. Законитост на постапките при вработување во самото обвинителство утврдување на можни конфликтни интереси или непотизам при вработување како и трошењето на средствата по однос на сомнителни хонорари за она што го имаме како дојава за потпишување на договори за чување на деловна тајна која што сметаме дека по самиот опис на работа не би требало да ги исклучуваат обвинителите или вработените внатре во обвинителството бидејќи законот им налага во секој случај со самото засновање на работен однос да чуваат деловна тајна а сметаме дека имало голем дел на такви договори и исплатени хонорари кои што според нас немаат законска основа“, рече Милошоски.

Како придружни членови или набљудувачи, би биле поканети и претставници на Шведската, Американската и Холандската амбасада, бидејќи како што рече, овие три држави имаа значителен финансиски учинок и влог во буџетот на СЈО од даночните обврзници на нивните земји и сметаме дека би имале право да имаат увид во тоа како биле потрошени или како се располагало со средствата на нивните даночни обврзници во рамките на работата на СЈО.

Инаку, до петок ќе се знае дали Судот ќе и го укине притворот на Катица Јанева откако денеска беше доставено такво барање со предлог други мерки за обезбедување и гаранција во недвижен имот. 

Таа е во притвор за случајот „Рекет“.