Становите во Скопје се на децата: Со каков имот ќе се гарантира за Катица Јанева?

Добивај вести на Viber

Барање за укинување на притворот за Катица Јанева, најави нејзината адвокатка Ирена Фрчкоска вчера. Тврди дека е влошена нејзината здравствена состојба и дека како гаранција ќе биде понуден имот на довчерашната специјална обвинителка. Но што поседува во актуелниот анкетен лист, притворената Јанева?

Според податоците кои се објавени, таа како личен имот има земјоделско земјиште, куќа и плац во Гевгелија и во околината. Во регистарот стојат и двата стана во Скопје, едниот 72 квадратни метри, другиот 68 квадрати, но тие се наведени како имот на децата. Друг недвижен имот Јанева не поседува.

Таа има неколку моторни возила, а како нејзино лично возило е прикажан Ровер 45 од 2001 година. Ауди А6 и Голф 4 се возила за кои стои дека се имот на деца. Јанева поседува и Хингај за кој е напишано дека е имот на брачен другар.

Инаку таа во листот има наведено дека има неколку депозити во банки. Станува збор за четири партии сите во Алфа банка – сега е Силк роуд банка и се во вкупна вредност од близу седум милиони денари ( 112 илјади евра) . Јанева пријавила и неколку кредити.