Азербејџан ќе испорачува природен гас за Бугарија?

Добивај вести на Viber

Изборот на Транјадранскиот гасовод за испорака на азербејџански гас за Европа не значи дека Азербејџан се откажува од плановите за испорака на гас во Бугарија, изјави потпретседателот на азербејџанската државна нафтена компанија СОКАР, Елшад Насиров, пишува БНР. Според Насиров, Бугарија може да стане првиот купувач на  азербејџански гас испорачан преку Трансјадранскиот гасовод во Европа. Тој се осврнал и на врските кои постојат меѓу Бугарија и Грција. Претходно Грција со шампањско ја прослави одлуката природниот гас од Азербејџан да се пренесува преку Трансјадранскиот гасовод ТАП кој ќе поминува низ нејзина територија. Азербејџанскиот гасен гигант Шах Дениз вчера официјално објави дека го избрал гасоводот ТАП наместо конкурентот „Набуко запад“. Ова се добри вести за Грција, Албанија и Италија низ кои од Азербејџан ќе се пренесува гас во Европа, но и за останатите држави од Балканот кон кои се отвора можност да се пуштат краци од ТАП. Бугарите сега ова го имаат како предност, коментираат тамошните медиуми.  Ваквиот развој на работите може да доведе до крај на проектот Набуко, кој веќе еднаш сктарен кон западната траса. Во исто време, бугарскиот министер за енергија Драгомир Стојнев вели дека гасоводот не треба да биде отпишан, бидејќи има и други наоѓалишта, кои се во процес на истражување и развој во регионот. Претседателот Росен Плевнелиев пак прецизираше дека во разговорите со неговиот азербејџански колега добил уверување дека Бугарија ќе ги добива ветените количини природен гас. На крајот на 2011 година, претседателот Георги Парванов договори испорака на 1 милијарда кубни метри природен гас. Гасоводот ќе има должина од 800 км, и  ќе почне да се гради во 2015 година, а ќе минува низ три држави и од кои 478 км низ Грција почнувајќи од грчко- турската граница каде што ќе се поврзе со турскиот гасовод ТАНАП.