Банкнотата од 500 евра привлечна само за криминалците?!

Добивај вести на Viber

Германските трговци и економските експерти бараат да се повлече банкнотата од 500 евра, со објаснување дека оваа пара е привлечна само за криминалците.

Надлежните банкарски институции се уште не се уверени дека укинувањето на оваа банкнота е оправдано.

Голем број Германци оваа банкнота, која има виолетова боја ја знаат само од весници и од телевизија. Оние кои ретко ја имале во рака знаат дека е многу тешко да се ослободат од неа.

Така на пример на бензинските пумпи уште на влезот стои известување дека не примаат банкноти од 500 евра од безбедносни причини. И во голем број продавници, посебно во помалите, продавачите одбиваат да ја примат.

Здружението за малопродажба смета дека банкнотата од 500 евра задолжително треба да се укине. Голем број на трговци во касите воопшто немаат означено место за чување на оваа банкнота и покрај тоа што се обврзани да ја примат секоја важечка банкнота.

Според прописите, трговците никој не може да ги принуди на некоја купопродажна трансакција доколку не сакаат да ја направат. Поради тоа, голем дел од нив ги враќаат муштериите кои сакаат да платат со банкноти од 500 евра.

Економистите, исто така се против банкнотите од 500 евра и сметаат дека тие се интересни само за криминалците и оние кои се занимаваат со перење на пари и корупција.

Меѓутоа, според германските медиуми Европската централна банка која е задолжена за нивно издавање се уште одбива да ги повлече банкнотите од 500 евра.