БАРААТ ПОМОШ И ОД ФОН ДЕР ЛАЈЕН: Некои членки на ЕУ против зголемениот увоз на земјоделски производи од Украина
Објавено во: Економија 01 Април, 2023
Шефовите на држави и влади на Бугарија, Унгарија, Полска, Романија и Словачка испратија писмо до претседателката на Европската комисија, Урсула фон дер Лајен, во кое повикуваат на преиспитување на мерките за борба против негативните ефекти од зголемениот увоз на земјоделски производи од Украина во овие земји, објави прес-службата на бугарскиот претседател.
Според лидерите на петте земји-членки на ЕУ, војната на Русија против Украина доведе не само до огромно зголемување на производствените трошоци во земјоделскиот сектор и деловните ризици, туку и до проблеми на земјоделските пазари во Европа, се вели во писмото.
Најсериозните потешкотии поради значителното зголемување на понудата на земјоделски производи се забележани токму во земјите кои граничат со Украина или во нејзина непосредна близина.
Во исто време, тешкото пласирање на вишокот жита, маслодајни и други култури во магацините ги дестабилизира пазарите и доведува до наметнување дополнителни трошоци за земјоделските производители.
Во писмото се нагласува потребата од значително зголемување на финансирањето на ЕУ за мерките за поддршка, при што лидерите бараат дополнителни извори на финансирање за поддршка на земјоделците кои претрпуваат штета и се изложени на ризик да ја загубат ликвидноста.
Европската комисија е исто така поканета да ја анализира можноста за купување на вишок жито од земјите-членки кои се соседи на Украина за хуманитарни цели.
Потврден е и повикот за финансиска поддршка од ЕУ за побрз развој на транспортната инфраструктура и зајакнување на врските за да се овозможи непречен трансфер на стоки од Украина во трети земји.
Украина, еден од најголемите светски извозници на жито, ги блокираше своите пристаништа на Црното Море по руската инвазија во февруари 2022 година и најде алтернативни транспортни патишта низ земјите на Европската унија, Полска и Романија, а таканаречените логистички тесни грла доведоа до големи количини украинско жито, што се поевтини од оние што се произведуваат во ЕУ, завршуваат во земјите од Централна Европа, што се одрази на продажбата на производите на локалните производители.