Бишев стартува во Шпаркасе банка во Мај

Добивај вести на Viber

Банкарскиот систем во Република Македонија навистина е стабилен и ликвиден, изјави денеска директорот на Стопанска банка Глигор Бишев, кој од 1 мај заминува за директор во Шпаркасе банка. Бишев денеска одржа предавање пред студентите на Економскиот факултет во Скопје, каде потенцира дека за постоењето на висока финансиска стабилност постои консензус, но оти тоа не треба да не задоволува и дека треба да се одржува и да се подигнува на повисоко ниво. - Македонија и Албанија се единствените земји што ја имаат таа предност во регионот. Сите останати Србија, Бугарија, БиХ, Хрватска и Романија имаат сооднос на заемите спрема депозитите над 100 проценти, што значи дека во тие земји без дополнителен прилив на странски капитал не е можно да се зголеми кредитната поддршка на стопанството, а такво ограничување во Македонија банките немаат, изјави Бишев. Посочувајќи дека порастот на нефункционалните кредити е занемарлив, наведе дека во Бугарија во 2012 година во однос на 2008 година лошите пласмани се зголемени за седум пати и имаат процент од 17,5, во Хрватска се зголемени за 10 пати, а во Македонија се зголемени од 7,5 на 10,5 отсто, значи не повеќе од 50 проценти. - Се надевам дека кризата брзо ќе заврши и нема да има потреба да се прологираат продавањето на овие капацитети, рече Бишев.