„Благој Ѓорев“ со добивка од 2,6 милиони денари во првите три месеци од годинава

Добивај вести на Viber

Компанијата за преработка на маслодајни семиња “Благој Ѓорев” АД од Велес, во првиот квартал од оваа година оствари солидни финансиски резултати, во согласност и со очекувањата на акционерите.  Билансот на успех на компанијата, објавен на Македонската берза покажува дека фабриката Благој Ѓорев остварила нето добивка во висина од 2,6 милиони денари во периодот од први јануари до 31 март. Оваа компанија која минатата година го одбележа својот јубилеен 90-ти роденден, во овој период остварила вкупни приходи од продажба во висина од 127,3 милиони денари, од кои најмногу на  домашниот пазар - 118,3 милиони денари, а остатокот на странските пазари. Во изминатиот период компанијата ги интензивираше напорите за пласман на производите на странски пазари, па така склучи договор за соработка и со  деловните партнери во Црна Гора и отсега производите од своето портфолио ќе ги пласира и на овој пазар, а поради зголемената побарувачка и добрата прифатеност од страна на потрошувачите, Благој Ѓорев ќе реализира и поголем извоз на своите производи од досегашниот во Албанија. Покрај овие два странски пазари, оваа македонска компанија веќе трета година по ред извезува поголем асортиман од своите производи во Косово, а од пред две години и во Босна и Херцеговина. На странските пазари се пласираат добропознатото масло за јадење Кристал, повеќе видови на маргарини, како и други производи од широкиот асортиман на оваа македонска компанија.