Книга за најкреативните читатели на Фактор: Богат татко, сиромашен татко!

Добивај вести на Viber

Фактор на својата прва годишнина Ви подарува книга. БОГАТ ТАТКО, СИРОМАШЕН ТАТКО од  Роберт Киосаки е книга што го растресе финансискиот свет! Што да направите за парите да работат за вас, а не вие да работите за пари? Повторно Ве повикуваме да бидете креативни, а воедно да ги проширите своите видици. На нашиот читател кој ќе го даде најкреативниот одговор на прашањето „Кој е најдобриот совет што сте го добиле од Вашиот татко“ (Ве замолуваме одговорот оставен на нашата Фејсбук страна под овој текст, да нема повеќе од 10 реда!) Фактор ќе му ја додели оваа хит книга за оваа година.  Психолозите советуваат дека првите пет години од животот се најважни за правилен детски развој, за да се има самодоверба и самопочит. Исто така добрите совети и правилното насочување од најмали години влијае колку во иднина еден човек ќе се саморазвие и колкаво богатство ќе создаде. Дали даваме добри совети како родители и дали самите ние донесуваме правилни бизнис одлуки? Секако една од најчестите мисли кои ни се појавуваат е таа: што ќе се случеше со мене доколку се одлучев за другата опција! Токму на другата опција, на почеток можеби потешкиот пат, нѐ упатува авторот Роберт Киосаки, со своето дело. Како да работиме за себе, како парите да работат за нас, а не ние за нив, како да стекнеме богатство, се дел од темите на кои се осврнува Киосаки. Што е разликата во погледите и ставовите на богатите во споредба со обичните луѓе? Во што се разликуваат нивните постапки што даваат драстично поинакви резултати? Киосаки во своето детство е советуван од двајца татковци, неговиот вистински татко, високо образован човек, што работи за плата, кој отсекогаш му велел да има добри оцени, да заврши факултет, и да најде добра и сигурна работа, за разлика од неговиот втор татко, или таткото на неговиот најдобар другар, човек кој завршил само основно училиште, а сега успешен бизнисмен, милионер, кој му ги отвора очите за огромните грешки кои што ги сторил неговиот „сиромашен“ татко во врска со парите. Како најдобро да дознаеме како размислуваат сиромашните, а како богатите? Богат татко, сиромашен татко е почетна точка за секој што сака да има контрола над својата финансиска иднина. Роберт Киосаки, инвеститор-милионер, автор и предавач, не тера  целосно да преиспитаме како функционираат парите,  нè учи како да работиме на сопствената финансиска интелегенција, како да го забрзаме финансискиот прогрес и како ризикот да ни стане сојузник. Образованието е важно, но важно е и да го победиме стравот од сиромаштија, “кој ни ги отсекува нозете” и не тера да работиме за плата, за други, да бараме сигурна работа, во свет каде ништо не е сигурно, и каде утре независно колку години сме работеле, и што сме направиле за таа компанија, можеме да бидеме отпуштени. Затоа треба да работиме на себе, за себе и секогаш да размислуваме долгорочно. Книгата е доста поучна, и може да им користи не само на повозрасните личности, родителите, туку и на оние кои допрва ќе влегуваат во светот на финансиите и  проблемите и кои се соочуваат со проблеми за кои не ни мислеле дека ќе се појават. Роберт сепак се стекнува со високо образование што смета дека ќе му биде корисно во животот, но тој го одбрал патот на неговиот богат татко и почнал да го слуша него и парите да се вртат околу него. Секако ставовите се различни на двајцата родители, и тоа е она што го поттикнало да размислува повеќе за својата иднина и за неговата цел уште од малечок, да биде богат. Неговиот татко секогаш викал: „Богат сум деца, затоа што ве имам вас.“, а другиот пак зборувал: „Деца, морам да бидам богат, затоа што ве имам вас“, нормално, кој став повеќе ви одговара? Секако на вториот татко. Основна работа која се учи од книгата е дека мрзливоста негативно влијае и врз здравјето и врз богатството. Тоа е тоа што го кажува Роберт дека едниот татко финансиски зајакнувал, а другиот ослабнувал, и како компарација го зема со реалноста за две личности, едната посетува фитнес редовно, а втората седи на каучот и гледа телевизија. Значи доколку сакате да ја сознаете личната финансиска перспектива за тоа како функционираат парите и како да работиме на сопствената финансиска интелегенција, ова е вистинската книга. Редакција Фактор